Velkommen til Arena Overøye

Siste helg var det fleire hundre gjester både laurdag og søndag ved alpinsenteret i Overøye. For å halde alle hjula i gang, må funksjonærar vere på plass både her og der. Ingvill og Ingvild hadde søndag fullt arbeid i billettbua. Alle trekka var i drift. Beltetrekket eller skibandet som det blir kalla, er svært populært blant dei yngste. Dette er eit gratis tilbod for barn og andre som er i opplæringsfasen før dei tar fatt på dei store skitrekka.

Bildetekst: Ingvill Flo og Ingvild Mistereggen ved den nyinnkjøpte snøscooteren
Foto: Kristian Almås

Det er venta stor aktivitet i Overøye til helga. Snøforholda er no på sitt aller beste, og preparering av løyper og trasear går sin gang. Med dei store mengdene av nysnø i området må vi fråråde laussnøkøyrarar å sette utfor i bratte heng, men heller halde seg i nærleiken av SuperG-traseen og dei andre opptrakka løypene.

Bildetekst: Kristiane Nakken i slalåmløypa
Foto: Hallgeir Hove

Arena Overøye vil arrangere skidag i Stordal laurdag 20. februar, kl. 1130-1630.
Det vil bli moglegheit for å prøve og lære om mange ulike vintersports-hjelpemidlar, alt frå sittande alpinski (eigenkjørt eller ledsagarkjørt), ake- og langrennsutstyr.

Måndag 22. februar er det klart for den store ski, skred og snødagen for deg mellom 12 og 17 år.

Den Norske Turistforening vil avvikle 80 turarrangement over heile landet komande helg, og eitt av desse blir ved Fokhaugstova i Stordal. Arrangementet startar kl 11.00 og varer til kl 15.00.

Ved Arena Overøye er det full køyr for tida. Sist helg var besøkstalet rundt 700 einskildpersonar både laurdag og søndag. Dagleg leiar Rune Støversten seier seg godt nøgd med drifta så langt. Trass i ein noko sein start på sesongen følgjer driftsinntektene budsjettoppsettet.

Den store parkeringsplassen i Overøye tar fleire hundre bilar. Førstkomande helg vil det vere parkeringsvakter på plass, og alle som vil nytte alpinanlegget eller som skal ut på tur, vil få parkeringsplass.
Store og små er velkomne!

Bildetekst: Endestasjonen for Poma-trekket. Området ved Fokhaugstova er synleg om lag midt på bildet.
Foto: Kristian Almås

Etter regn og kramsnø har det siste natta kome 40 cm lett nysnø i Øvre Stordal. Ei ny helg nærmar seg, og dette ser ut for å bli den første snørike helga ved Arena Overøye denne sesongen. Trakkemannskapa vil sikkert vere på plass og sørgje for gode løyper både i alpinbakkane og i turområdet. Velkommen til nye skiopplevingar i Stordal.

Bildetekst: Skiløype ved Kambemyrane med Auskjeret og Stolen i bakgrunn
Foto: Kristian Almås

Ei redningsøving vart i dag gjennomførd ved Arena Overøye. Eit helikopter med mannskap var der for å øve saman med Stordal Skipatrulje. Vi viser elles til det som er skrive om den nystarta skipatruljen her på nettsida 10. januar. Det som skjedde no i dag, var altså berre ei øving, men det er bra å vite at hjelpa er nær, om ulykka skulle vere ute.

Bildetekst: Redningshelikopter ved Øranakken.
Foto: Thomas Henden

Som eit prøveprosjekt har Arena Overøye leigd inn ein del snøproduksjonsutstyr. Det er lagt ut omkring 600 m med slange frå Øravatnet. Der er det rikeleg med vatn å ta av. Naturleg nok tok det litt tid å få dette utstyret på plass og å få det til å fungere. No har snøproduksjonen vore i gang frå fire snøkanonar (lansar) i 4-5 døgn, og den produserte snøen vil bli lagd ut i Super G-løypa der det trengst.
Det er gode forhold i Overøye i dag, laurdag, og i morgon kan det bli endå betre både med omsyn til snø og ver.

Bildetekst: Snøproduksjon ved Arena Overøye
Foto: Magnus Selboskar