Velkommen til Arena Overøye

Etter regn og kramsnø har det siste natta kome 40 cm lett nysnø i Øvre Stordal. Ei ny helg nærmar seg, og dette ser ut for å bli den første snørike helga ved Arena Overøye denne sesongen. Trakkemannskapa vil sikkert vere på plass og sørgje for gode løyper både i alpinbakkane og i turområdet. Velkommen til nye skiopplevingar i Stordal.

Bildetekst: Skiløype ved Kambemyrane med Auskjeret og Stolen i bakgrunn
Foto: Kristian Almås

Ei redningsøving vart i dag gjennomførd ved Arena Overøye. Eit helikopter med mannskap var der for å øve saman med Stordal Skipatrulje. Vi viser elles til det som er skrive om den nystarta skipatruljen her på nettsida 10. januar. Det som skjedde no i dag, var altså berre ei øving, men det er bra å vite at hjelpa er nær, om ulykka skulle vere ute.

Bildetekst: Redningshelikopter ved Øranakken.
Foto: Thomas Henden

Som eit prøveprosjekt har Arena Overøye leigd inn ein del snøproduksjonsutstyr. Det er lagt ut omkring 600 m med slange frå Øravatnet. Der er det rikeleg med vatn å ta av. Naturleg nok tok det litt tid å få dette utstyret på plass og å få det til å fungere. No har snøproduksjonen vore i gang frå fire snøkanonar (lansar) i 4-5 døgn, og den produserte snøen vil bli lagd ut i Super G-løypa der det trengst.
Det er gode forhold i Overøye i dag, laurdag, og i morgon kan det bli endå betre både med omsyn til snø og ver.

Bildetekst: Snøproduksjon ved Arena Overøye
Foto: Magnus Selboskar

Billetteringssystemet ved Arena Overøye viser at rundt 900 personar har vore i skibakkane denne helga. Laurdag var besøkstalet ca 400, og i dag på søndag var talet over 500. Alle fire trekka har vore i full drift, og det har til dels vore kø ved påstigingsstasjonane. Dette fortel billetteringsvaktene no i ettermiddag. Det er altså mange som trenar i SuperG-traseen. I enkelte parti av traseen ville det vore ønskjeleg med litt meir snø, men alt har gått greitt denne helga også, og utan skadar av nemneverdig art.
I turløypene var det eit jamt sig av folk på turski. Mange familiar var ute med små barn som skulle lære å gå på ski. Andre gjekk ein etterlengta luftetur for seg sjølv - og kanskje for hunden. Temperaturen har vore omkring 0 grader denne helga.

Bildetekst: Sola stig frå dag til dag
Foto: Kristian Almås

Frå og med neste helg er eit nytt tilbod på plass i Arena Overøye.

Arena Overøye kan også søndag melde at anlegget har vore godt besøkt. Godt over 300 personar har vore i alpinbakkane i dag. Det er første helga vi held ope denne sesongen, og vi reknar dette som ein svært god start. Mange kjem hit på dagstur, men mange er det også som greier å få hyttene sine så varme at dei kan vere der over helga.

Ute i turløypene var det mange som mosjonerte, og her var også aktive grupper av langrennsløparar i trening under gode forhold.

Bildetekst: Nederlendarar i sporet
Foto: Kristian Almås

Bortimot 300 personar besøkte skisenteret i dag for å prøve SuperG-løypa og dei andre nedfartene. Vi har hatt ein skikkeleg vinterdag med godt føre og rundt 15 minusgrader. Dessverre har kulden ført til at beltetrekket ikkje kunne køyrast i dag, og det er også usikkert om det kan gå i morgon. T-trekket hadde kapasitet til å ta unna alle som ville til toppen. På grunn av kulden og visse vanskar med trekktraseen blir ikkje Poma-trekket oppstarta denne helga.

Ute i terrenget elles kunne ein sjå mange som hadde funne fram turskiene og dei beste vinterkleda for å få ei oppleving av ekte norsk vinter.

Bildetekst: T-trekket i full drift
Foto: Kristian Almås

No på fredagskvelden ser det ut for å bli ei fin helg med kaldt og roleg vinterver i Stordal. SuperG-løypa i Overøye er trakka opp og ferdig til bruk. T-trekket vil vere i bruk heile helga.

Stordal Fjellservice melder at turløypa over Seljebotsmyrane er oppkøyrd og i fin stand. På laurdag vil dei også prøve å køyre opp løype mot Storvatnet.

Bildetekst: Arena Overøye januar 2010
Foto: Kristian Almås