Velkommen til Arena Overøye

Arena Overøye har no stengt for sesongen, men turområdet ligg ope. Snøforholda i turløypene var i alle fall gode 2. påskedag. Her kan til dømes nemnast turen innover Jolbotnen mot Kleiva. Frå Kleiva ser du nedover mot Tresfjorden og Romsdalsfjorden. I dette terrenget kan du gå på ski også førstkomande helg. I høgfjellet vil snøen halde seg endå ei stund framover.

Bilde: Skiløype mot Kleiva med Skorkja i sol og skodde i bakgrunn

Vi reknar med at tilstrøyminga av folk til Arena Overøye og turområdet har sett dagsrekord for denne sesongen i dag. Billettsystemet registrete 600 einskildpersonar i trekka. Parkeringsplassen vart oppfylt ved 12- tida, og etter det måtte mange parkere langs fylkesvegen.

Det er venta stor utfart no i påska. Ved Arena Overøye er det ein stor parkeringsplass. Dersom denne plassen blir godt utnytta, kan bortimot 500 bilar parkerast der. I påska i fjor vart endåtil denne store plassen i minste laget eit par dagar.

På strekninga frå Seljehaug til skiltet med fartsgrense 30 km/t er vegen så brei at ein kan parkere på eine sida av vegen. Dersom det blir parkert på begge sider av vegen, skaper det alvorlege hindringar for trafikken på vegen. I verste fall kan dette føre til at utrykkingsbilar (politibil/sjukebil/brannbil) blir hindra i å kome fram.

Gode råd til dei som besøker oss på store utfartsdagar, blir då:

1. Hjelp til slik at den store parkeringsplassen blir utnytta på beste måte.
2. Parker berre på eine sida av fylkesvegen.

Stordal Fjellservice preparerer turløypene med løypeleggingsmaskin, men dei disponerer også snøscooter som kan brukast til varetransport. Dei kan altså ta på seg transportoppdrag. Nærare opplysning om dette finn du på nettsida deira. Ved informasjonskiosken i Overøye finst det ei kasse med giroblankettar. Gåver som kjem inn til Stordal Fjellservice på denne måten, går til drift av løypeleggingsmaskinen. Dei godt preparerte turløypene er til glede for mange.

Stordal Fjellservice

Bilde: Løypeleggingsmaskinen på Fokhaugen
Foto: Bjørnar Midtbust

NATTOPENT!

Laurdag kveld 4. april held vi ope for kveldskøyring frå 21.00 til 01.00.
Vi satsar på stor stemning i bakken!

Ni bussar står oppstilte på parkeringsplassen i Overøye no i dag. Det var det som måtte til for å frakte elevar frå Kolvikbakken skole til skitrekka og alpinbakkane. Alle trekka går, og det er stor aktivitet. Mange driv med slalåmski og skibrett i dei brattaste bakkane, og andre bruker dagen til skileik eller til å renne på akebrett. I tillegg til dei omkring 250 skuleelevane har også andre tatt turen til skisentret og turområdet i det fine veret og under dei gode snøforholda som vi no har. Ingvild Mistereggen og Bjørg Jacobsen er på plass også i dag som to av dei som gjer funksjonærteneste.

Nysnøen dalar ned over Overøye no laurdag kveld - det ligg an til eit nydeleg pudderføre i morgon!

Også i dag vart det ein fin dag med sol og snø ved Arena Overøye. Elevar frå mange skular fekk ei verkeleg fin vinteroppleving no i slutten av mars når mange snakkar om vårteikn både her og der. Forholda for alpinsport i dei velpreparerte bakkane kan ein neppe tenkje seg betre.